زانیاری نوێ لەبارەی هاوتا کردنی مووچەی خانەنشینانی هەرێم لەگەڵ بەغدا

زایەڵە ـ چاوەڕوانی کردن بۆ هاوتاکردنی موچەی خانەنشینانی هەرێم و بەغدا، کۆتایی دێت و لەمساڵدا هاوتای خانەنشینانی عێراق دەکرێن.
سۆران عومەر پەرلەمانتاری عیراق  رایگەیاند، بەغدا بەنیازە یاسای خانەنشینى عێراق لە هەرێمی کوردستان جێبەجێ بکات بەوەش کەمترین مووچەی خانەنشینانی هەرێم ٥٠٠ هەزار دینار دەبێت.
بەپێی زانیارییەکان ئەو مووچەخۆرانەی لە دوای ساڵی ٢٠١٥ـەوە خانەنشینکراون، سەرەتا پلەبەرزکردنەوەی ئەو ساڵانەیان بۆ دەبەسترێت کە راگیرابوو، دواتر لەسەر دواین مووچە، مووچەی خانەنشینیان هاوتای بەغدا دەکرێت.
موچەی خانەنشینانی هەرێم تاوەکو ئێستا بە یاسای ساڵی ٢٠٠٦ و چەند یاسایەکی دیکەی خانەنشینی کار دەکات کە بەشێک لە خانەنشینان موچەکانیان کەمترە لە ٢٠٠ هەزار دینار، ئەوە لە کاتێکدایە لەساڵی ٢٠١٤دا یاسایی یەکگرتووی خانەنشینی لە عێراق پەسەندکرا، یاسای یەکگرتووی خانەنشینی کەمترین موچەى خانەنشینیشى بە ٥٠٠ هەزار دینار داناوە، بەڵام هەرێم جێبەجێی نەکردووە.
هاوکات سەرچاوەیەک لە وەزارەتی دارایی هەرێمی کوردستان بە  میدیاکانی راگەیاندووە، لە داهاتوویەکی نزیکدا لیستی مووچەی خانەنشینانی هەرێم رەوانەی بەغدا دەکەن بۆ ئەوەی پرۆسەی بە هاوتاکردنی مووچەکانیان جێبەجێ بکرێت.
کامەران کەریم